ساوه دن بیر ایشیق


 اکبرخان رزاقی نین (۱۳۶۸- ۱۲۹۹) شعر دیوانی «ساوه دن بیر ایشیق» آدیندا اندیشه نو انتشاراتی طرفیندن یاییملاندی. شاعیرین ایلک کیتابی «گلزار حسینی» عنوان ایلا دکتر علی کمالی امگی ایله یاییملانمیشدیر. اکبرخان رزاقی گونش ایلی 1299-دا ساوا شهری نین قاراقان بولگه سینين میصیرقان کندینده اکینچی بیر عاییله ده دوغولوب، بویا- باشا چاتیب و کند ایشلرینده ایشله میشدیر. کند ایشلری آراسیندا ادبیاتلا ماراقلانیب تورک، عرب و فارس ادبیات لارینی چوخ گوزل اؤیرنمیشدیر. اکبرخان تحصیلاتينی قدیم مکتب لرده بیتیرمیشدیر. اوزل چالیشمالاری نتیحه سینده اوز آنا دیلی نین ادبیاتیندا بؤیوک اوغورلار قازاناراق یوکسک سویه لره چاتمیشدیر. شاعیر رزاقی آرتیق اؤز آنا دیلینده یازیب- یاراتمیش و طبیعی اولاراق ساوه نین تورک لهجه سی و قاراقانین دیالکتی نین ایزلرینی اونون اثرلرینده آیدینجه گؤرمک اولا بیلر. شاعیر اؤز اثرلرینده اینسانی سجیه لری قورویارکن عدالت سیزلیگه، ظولمه، بیلمه مزلیگه قارشی چیخیر و اجتماع نین آجی لارینی اوره گه یاتان بیر دیل ایله اوخوجولارا چاتدیریر و مهارتله مظلوملاری مدافعه ائده رک، ظالیم لری آجی بیر طنز ایله قامچیلاییر! رزاقی دوغما کولتور و آنا دیلینه درین محبتینی بیلدیریر و اؤز آنادیلی نی، کولتور و فرهنگی انکار ائدیب دانانلاری سرت تنفید ائدیر .حاج اکبر رزاقی هر ایل میصیرقان کندینده تاسوعا - عاشورا گونلرینده شبیه چیخارتما مراسیمینده ایشتراک ائدیب و شبیه اوخوجولاری نین مکالمه لرینی اؤزو یازیب حاضیرلاییردی. سونوندا 70 ایله یاخین حیات سوردوکدن سونرا، 1368 ایلین مورداد آیی نین 19-دا تاسوعا گونو میصیرقان کندینده شبیه مراسیمینده ایشتراک ائدرکن دونیادان کوچموشدو. بو دیوانی اونون اوغوللاری حسین و جعفر ياييما حاضيرلاميشلار.

 آدرس انتشارات: تهران، ميدان انقلاب، ابتدای كارگر شمالی، پاساژ فيروز، طبقه دوم، انتشارات اندیشه نو

تلفن تماس:66427371